الفجر الزاهي
قدمت بها الفنانة أنطوانيت الدويهي عام 1987
سْأَلْتَا: بْمِين بْتِتْبَاهِي
قَالِتْ: بِالْفَجْر الزَّاهِي
بِالتَّلْج الأَبْيَضْ.. بِالأَرْزْ
بِالْبِرْدَوْنِي.. بِمْلاهِي
خَلِّتْ أَرْضِي تْعِيش بْعِزّ
وِبْمَجْدَا الْمَجْد تْضَاهِي
بْإِهْدِن وِبْبِنْتَا بِعْتَزّ
أَنطْوَنيتْ الْـ عَمْ بِتْهِزّ
الْغُرْبِه.. تَا يِكْبَرْ جَاهِي
**
بحّة صوتك
قدّمت بها الفنّانة أنطوانيت الدويهي عام 1982
مِتْل النّجْمِه.. خَلِّي النُّورْ
يرَدِّدْ لَحنْ غْنانِينَا
مِنْ إِهْدِنْ إسْمِكْ مَنْدُورْ
مْن الأَرْض الْـ فِيها رْبِينا
بْبَحِّةْ صَوْتِك صَوْت طْيُورْ
خَلِّي الأُوف تْلاقِينا
صَوْتِكْ بِيحِبُّو الْجُمْهُورْ
يا دْوَيْهِيِّه.. غَنِّينَا
**
من إهدن
قدمت بها الفنانة أنطوانيت الدويهي عام 1986
مِنْ إِهْدِنْ.. مِنْ حَدّ الأَرْزْ
مِنْ أَرْض انْجَبْلِت بِالعِزّ
طَلِّتْ.. طَلِّتْها حْكايِه
بْغُرْبِه.. جْرُوحاتا بِتْنِزّ
وِالْفَن الْـ كان بْدايِه
صَفَّى بْمُوَّالا يِعْتَزّ
يا دْوَيْهِيِّه اللِّي جايِي
مِنْ بْلادِي.. مِنْ أَحْلَى بْلادْ
نِحْنا بْصَوْتِكْ عَم نِعْتَزّ
**
كنا قلال
قدّمت بها الفنانة أنطوانيت الدويهي عام 1989
زَرْعِتْ فَنّ بْمَهْجَرْنا
مِنْ سِنْة الْواحْد وْسَبْعِينْ
وْأَكْتَرْ.. لَوْلا تْذِكَّرْنا
مِينْ عَمَّرْ مَسْرَحْنا مِينْ؟!
كِنَّا قْلال.. بْيِغْمُرْنا
صَوْتا.. الْـ سَوْسَحْ مُغْتِرْبينْ
وْمِنْ دُونْ خَمْرَه سَكَّرْنا
وْمَحَّى مِنْ غُرْبِتْنا سْنينْ
دْوَيْهِيِّه فِيها كْبِرْنا
وْبِزْغَرْتا زَلْغَطْ صنّينْ
**
بيت عتابا
قدمت بها الفنانة أنطوانيت الدويهي عام 1975
عَ طُول بْمَهْجَرْنا كانْ
الْوَرْد يْفَتِّحْ عَ بْوابَا
نِجْمِه بْيِشْتَقْلاَ لُبْنانْ
وْدَمْعُو عَ الْخَدّ سْكابَا
جَايِي تَا تْرِشّ الأَلْحانْ
بْغُرْبِةْ أَهْلا وْأَحْبابَا
تْغَنِيلُنْ بَاقِةْ قِصْدانْ
تْعَمِّرْلُنْ بَيْت عْتابَا
يا دْوَيْهِيِّه الْـ بِالْهُجْرانْ
رِدِّي بْصَوْتِكْ عَ الأَوْطانْ
ناسْ انْحَبْسِتْ بِغْيَابَا
**
نبراس
قدمت بها الفنانة أنطوانيت الدويهي عام 1975
لِمِّنْ بِتْغَنِّي بْإِحْسَاسْ
بْيِسْكَرْ مِنْ نَغْمِتْها الْكاسْ
هِيِّي الصَّوْت الْـ خَلَّى الْفَنّ
بْمَهْجَرْنا يْصَفِّي نِبْراسْ
يا دْوَيْهِيِّه.. حَتَّى نْجِنّ
خَلِّي الصَّوْت لْنِصّ الليْلْ
يْرَنْدِحْ وِيْرَقِّصْ هَـ النَّاسْ
**
